tera KHayal sar-e-sham gham sanwarta hua

tirā ḳhayāl sar-e-shām ġham sañvartā huā

bahut qarīb se guzrā salām kartā huā

jhijak rahā thā vo mujh se nazar milāte hue

ki maiñ bhī thā isī ḳhāke meñ rañg bhartā huā

maiñ ġharq hone hī vaalā thā jab to ik tinkā

bhañvar se mujh ko dikhā.ī diyā ubhartā huā

milā vo pāñch sitāroñ kī raqs-gāhoñ meñ

zamāne bhar se pashemān ḳhud se Dartā huā

masāfateñ haiñ bahut aur saḳht rāhoñ se

guzar gayā hai vo mujh ko talāsh kartā huā

raqam huā nahīñ ab tak nisāb-e-ham-safrī

vo qāfila bhī milā jab to kuuch kartā huā

ajab tilism-e-safar hai ki shām-e-maqtal tak

pahuñch gayā huuñ maiñ har moḌ par Thahartā huā

kināra thā mire dariyā se kaT gayā vo shaḳhs

ki maiñ thā vaqt kī sarhad ko paar kartā huā

tera KHayal sar-e-sham gham sanwarta hua

bahut qarib se guzra salam karta hua

jhijak raha tha wo mujh se nazar milate hue

ki main bhi tha isi KHake mein rang bharta hua

main gharq hone hi wala tha jab to ek tinka

bhanwar se mujh ko dikhai diya ubharta hua

mila wo panch sitaron ki raqs-gahon mein

zamane bhar se pasheman KHud se Darta hua

masafaten hain bahut aur saKHt rahon se

guzar gaya hai wo mujh ko talash karta hua

raqam hua nahin ab tak nisab-e-ham-safri

wo qafila bhi mila jab to kuch karta hua

ajab tilism-e-safar hai ki sham-e-maqtal tak

pahunch gaya hun main har moD par Thaharta hua

kinara tha mere dariya se kaT gaya wo shaKHs

ki main tha waqt ki sarhad ko par karta hua