ترا پندار پہاڑوں سا پگھل جائے گا

ترا پندار پہاڑوں سا پگھل جائے گا

سرخ دریا ترے سورج کو نگل جائے گا

تو نے چھینے ہیں سمندر سے سفینے میرے

یہ تلاطم تری موجوں کا سنبھل جائے گا

ڈوبنے دیں گے تجھے اور نہ ملے گا ساحل

تو سمندر کے تلاطم پہ اچھل جائے گا

کب تلک کرتا رہے گا تو مسخر لہریں

تجھ کو اک روز سمندر یہ نگل جائے گا

وہ خریدیں گے ضمیروں کو یہاں سستے میں

وقت آنے پہ ترا یار بدل جائے گا

وہ بھلے چھین لیں ماتھے سے مرے سجدوں کو

ہم کو تو نفس سے مطلب ہے نکل جائے گا

پدمنی ہو یا کوئی اور حسیں مورت ہو

جلتے شعلوں میں یہ ایمان بہل جائے گا

اے مفکر ترے افکار پہ شک ہوتا ہے

تیرے الفاظ سے قرطاس یہ جل جائے گا

جسم کی طرح تری سوچ بھی مرتد ہوگی

بعد از مرگ کسی آگ میں جل جائے گا

تجھ کو معلوم نہ تھا تیرا وہ کامل ایماں

چند پیسوں کے لئے وہ بھی پھسل جائے گا

تم نے منشور بھی پرچم کی طرح تھاما ہے

تیرا ہر روپ اسی رنگ میں ڈھل جائے گا