tera pindar pahaDon sa pighal jaega

tirā pindār pahāḌoñ sā pighal jā.egā

surḳh dariyā tire sūraj ko nigal jā.egā

tū ne chhīne haiñ samundar se safīne mere

ye talātum tirī maujoñ kā sañbhal jā.egā

Dūbne deñge tujhe aur na milegā sāhil

tū samundar ke talātum pe uchhal jā.egā

kab talak kartā rahegā tū musaḳhḳhar lahreñ

tujh ko ik roz samundar ye nigal jā.egā

vo ḳharīdeñge zamīroñ ko yahāñ saste meñ

vaqt aane pe tirā yaar badal jā.egā

vo bhale chhīn leñ māthe se mire sajdoñ ko

ham ko to nafs se matlab hai nikal jā.egā

padmanī ho yā koī aur hasīñ mūrat ho

jalte sho'loñ meñ ye īmān bahal jā.egā

ai mufakkir tire afkār pa shak hotā hai

tere alfāz se qirtās ye jal jā.egā

jism kī tarh tirī soch bhī murtad hogī

bā’d-az-marg kisī aag meñ jal jā.egā

tujh ko mā'lūm na thā terā vo kāmil īmāñ

chand paisoñ ke liye vo bhī phisal jā.egā

tum ne manshūr bhī parcham kī tarah thāmā hai

terā har ruup isī rang meñ Dhal jā.egā

tera pindar pahaDon sa pighal jaega

surKH dariya tere suraj ko nigal jaega

tu ne chhine hain samundar se safine mere

ye talatum teri maujon ka sanbhal jaega

Dubne denge tujhe aur na milega sahil

tu samundar ke talatum pe uchhal jaega

kab talak karta rahega tu musaKHKHar lahren

tujh ko ek roz samundar ye nigal jaega

wo KHaridenge zamiron ko yahan saste mein

waqt aane pe tera yar badal jaega

wo bhale chhin len mathe se mere sajdon ko

hum ko to nafs se matlab hai nikal jaega

padmani ho ya koi aur hasin murat ho

jalte sho'lon mein ye iman bahal jaega

ai mufakkir tere afkar pa shak hota hai

tere alfaz se qirtas ye jal jaega

jism ki tarh teri soch bhi murtad hogi

ba’d-az-marg kisi aag mein jal jaega

tujh ko ma'lum na tha tera wo kaamil iman

chand paison ke liye wo bhi phisal jaega

tum ne manshur bhi parcham ki tarah thama hai

tera har rup isi rang mein Dhal jaega