ترا طرز عمل برق تپاں دیکھا نہیں جاتا

ترا طرز عمل برق تپاں دیکھا نہیں جاتا

چمن سے جا بجا اٹھتا دھواں دیکھا نہیں جاتا

چمن زاروں میں کچھ زاغ و زغن ایسے بھی ہیں جن سے

ہمارا شاخ گل پر آشیاں دیکھا نہیں جاتا

خداوندا اٹھا لے یا بصارت چھین لے میری

کہ اب مجھ سے تو یہ عہد رواں دیکھا نہیں جاتا

بلا سے کچھ نتیجہ ہو مرا تو فیصلہ یہ ہے

صداقت ہو تو کچھ سود و زیاں دیکھا نہیں جاتا

ضیا گر شعریت میں صنعت ایہام آ جائے

تو پھر اچھا برا حسن بیاں دیکھا نہیں جاتا