tera wahshi kuchh aage hai junun-e-fitna-saman se

tirā vahshī kuchh aage hai junūn-e-fitna-sāmāñ se

kahīñ dast-o-garebāñ ho na ābādī bayābāñ se

ilāhī jazba-e-dil kā asar itnā na ho un par

pareshāñ vo na ho jaa.eñ mire hāl-e-pareshāñ se

qayāmat hai vo aa.e aur aate hī hue vāpas

ye āsār-e-sahar paidā hue shām-e-ġharībāñ se

nazar vaale samajh jaa.eñ na arsh-o-farsh kī nisbat

tirā dāman na chhū jaa.e kahīñ mere garebāñ se

urūj-e-josh-e-vahshat 'sehr' hai ye roz-e-raushan meñ

nazar aate haiñ taare rauzan-e-dīvār-e-zindāñ se

tera wahshi kuchh aage hai junun-e-fitna-saman se

kahin dast-o-gareban ho na aabaadi bayaban se

ilahi jazba-e-dil ka asar itna na ho un par

pareshan wo na ho jaen mere haal-e-pareshan se

qayamat hai wo aae aur aate hi hue wapas

ye aasar-e-sahar paida hue sham-e-ghariban se

nazar wale samajh jaen na arsh-o-farsh ki nisbat

tera daman na chhu jae kahin mere gareban se

uruj-e-josh-e-wahshat 'sehr' hai ye roz-e-raushan mein

nazar aate hain tare rauzan-e-diwar-e-zindan se