tirchhi nazar na ho taraf-e-dil to kya karun

tirchhī nazar na ho taraf-e-dil to kyā karūñ

lailā ke nā-pasand ho mahmil to kyā karūñ

Thahre na ḳhūñ-bahā sū-e-qātil to kyā karūñ

haq ho jo ḳhud-baḳhud mirā bātil to kyā karūñ

ik rañg ko jahāñ meñ nahīñ koī māntā

har rañg meñ rahūñ na maiñ shāmil to yā karūñ

pisvā.ūñ be-gunāh jo dil ko hinā ke saath

pursān-e-hāl ho koī aadil to kyā karūñ

parvāna hone kī bhī ijāzat nahīñ mujhe

ālam-fareb hai tirī mahfil to kyā karūñ

jaatā gulū-burīda bhī uḌ kar guloñ ke paas

baazū gayā hai toḌ ke bismil to kyā karūñ

laila ye kah ke jalva dikhātī hai qais ko

uḌne lage jo parda-e-mahmil to kyā karūñ

ḳhud chāhtā huuñ zabt karūñ dard-e-shauq maiñ

dil hī mirā na ho mutahammil to kyā karūñ

muñh chuum luuñ ki gird phirūñ dauḌ dauḌ ke

ai dil jo haath rok le qātil to kyā karūñ

dam rāh-e-shauq-o-zauq meñ letā nahīñ kahīñ

is par bhī tai na ho jo ye manzil to kyā karūñ

kyūñ-kar na jabr dil pe karūñ apne iḳhtiyār

rāhat meñ aa paḌe koī mushkil to kyā karūñ

ik ik se pūchhte haiñ vo ā.īna dekh kar

ma.ashūq pā.ūñ pyaar ke qābil to kyā karūñ

de duuñ maiñ rāh-e-ishq meñ jaan us ke naam par

nā-chār huuñ na ho koī saa.il to kyā karūñ

Tāñke jigar ke zaḳhm meñ kyūñkar lagāne duuñ

gul tere baaġh kā ho muqābil to kyā karūñ

aane ko manā karte ho achchhā na ā.ūñgā

ye to kaho na maane mirā dil to kyā karūñ

shāyad mujhe jamāl dikhā de vo ai kalīm

nazzāre kā na huuñ mutahammil to kyā karūñ

mar jā.ūñ Duub kar 'sharaf' us paar yaar hai

kashtī na ho koī lab-e-sāhil to kyā karūñ

tirchhi nazar na ho taraf-e-dil to kya karun

laila ke na-pasand ho mahmil to kya karun

Thahre na KHun-baha su-e-qatil to kya karun

haq ho jo KHud-baKHud mera baatil to kya karun

ek rang ko jahan mein nahin koi manta

har rang mein rahun na main shamil to ya karun

piswaun be-gunah jo dil ko hina ke sath

pursan-e-haal ho koi aadil to kya karun

parwana hone ki bhi ijazat nahin mujhe

aalam-fareb hai teri mahfil to kya karun

jata gulu-burida bhi uD kar gulon ke pas

bazu gaya hai toD ke bismil to kya karun

laila ye kah ke jalwa dikhati hai qais ko

uDne lage jo parda-e-mahmil to kya karun

KHud chahta hun zabt karun dard-e-shauq main

dil hi mera na ho mutahammil to kya karun

munh chum lun ki gird phirun dauD dauD ke

ai dil jo hath rok le qatil to kya karun

dam rah-e-shauq-o-zauq mein leta nahin kahin

is par bhi tai na ho jo ye manzil to kya karun

kyun-kar na jabr dil pe karun apne iKHtiyar

rahat mein aa paDe koi mushkil to kya karun

ek ek se puchhte hain wo aaina dekh kar

mashuq paun pyar ke qabil to kya karun

de dun main rah-e-ishq mein jaan us ke nam par

na-chaar hun na ho koi sail to kya karun

Tanke jigar ke zaKHm mein kyunkar lagane dun

gul tere bagh ka ho muqabil to kya karun

aane ko mana karte ho achchha na aaunga

ye to kaho na mane mera dil to kya karun

shayad mujhe jamal dikha de wo ai kalim

nazzare ka na hun mutahammil to kya karun

mar jaun Dub kar 'sharaf' us par yar hai

kashti na ho koi lab-e-sahil to kya karun