tere aage adu ko nama-bar mara to kya mara

tire aage adū ko nāma-bar maarā to kyā maarā

na maarā jaañ se jis dam us ko gar maarā to kyā maarā

agar dil mārte apnā to kyuuñ ye zillateñ paate

tirī ḳhvāhish meñ zālim ham ne sar maarā to kyā maarā

vo māreñ qahqaha sun kar mirī sīna-zanī kā haal

idhar maarā to kyā maarā udhar maarā to kyā maarā

tumhāre haath to le letā apne haath se haihāt

dupaTTe se jo pahoñche bāñdh kar maarā to kyā maarā

na dekho duur se hī mujh ko in TeḌhī nigāhoñ se

kisī ko tiir tum ne pheñk kar maarā to kyā maarā

sabā ye kab jalan hotī jo shām-e-hijr gul hotī

tapāñcha sham.a ko vaqt-e-sahar maarā to kyā maarā

huā hai merī rusvā.ī se tere husn kā shohra

jo mujh ko jaañ se ai bedād-gar maarā to kyā maarā

tirī duurī meñ be-tāsīr gar ro.e to kyā ro.e

tirī furqat meñ na.ara be-asar maarā to kyā maarā

kahīñ hotā hai dil kā josh-e-saudā kam abas ragzan

ragoñ meñ merī tū ne neshtar maarā to kyā maarā

'nizām' is nafs-e-ammāra kī gardan bhī kabhī toḌī

javāñ-mardī kā dam tum ne agar maarā to kyā maarā

tere aage adu ko nama-bar mara to kya mara

na mara jaan se jis dam us ko gar mara to kya mara

agar dil marte apna to kyun ye zillaten pate

teri KHwahish mein zalim hum ne sar mara to kya mara

wo maren qahqaha sun kar meri sina-zani ka haal

idhar mara to kya mara udhar mara to kya mara

tumhaare hath to le leta apne hath se haihat

dupaTTe se jo pahonche bandh kar mara to kya mara

na dekho dur se hi mujh ko in TeDhi nigahon se

kisi ko tir tum ne phenk kar mara to kya mara

saba ye kab jalan hoti jo sham-e-hijr gul hoti

tapancha shama ko waqt-e-sahar mara to kya mara

hua hai meri ruswai se tere husn ka shohra

jo mujh ko jaan se ai bedad-gar mara to kya mara

teri duri mein be-tasir gar roe to kya roe

teri furqat mein nara be-asar mara to kya mara

kahin hota hai dil ka josh-e-sauda kam abas ragzan

ragon mein meri tu ne neshtar mara to kya mara

'nizam' is nafs-e-ammara ki gardan bhi kabhi toDi

jawan-mardi ka dam tum ne agar mara to kya mara