tere aate hi sab duniya jawan malum hoti hai

tire aate hī sab duniyā javāñ mālūm hotī hai

ḳhizāñ rashk-e-bahār-e-jāvedāñ mālūm hotī hai

junūn-e-sajda-rezī kā ye aalam hai ma.āz-allāh

har ik chaukhaT tirā hī āstāñ mālūm hotī hai

use har ahl-e-dil pahroñ maze le le ke suntā hai

mirī biptā hadīs-e-dil-barāñ mālūm hotī hai

kaTe haiñ din balāoñ ke sahāre jin asīroñ ke

unheñ bijlī bhī shāḳh-e-āshiyāñ mālūm hotī hai

ma.āl-e-zindagānī kī haqīqat khul ga.ī jab se

kasak dil kī matā-e-do-jahāñ mālūm hotī hai

ḳhayāl-e-aish kī parchhā.īñ se bhī dil laraztā hai

nigāh-e-husn ab kyuuñ mehrbāñ mālūm hotī hai

ḳhudā shāyad hai mere bhūlne vaale ba-juz tere

mujhe taḳhlīq-e-ālam rā.egāñ mālūm hotī hai

kisī kī justujū meñ 'vajd' us manzil pe pahuñchā huuñ

jahāñ manzil bhī gard-e-kārvāñ mālūm hotī hai

tere aate hi sab duniya jawan malum hoti hai

KHizan rashk-e-bahaar-e-jawedan malum hoti hai

junun-e-sajda-rezi ka ye aalam hai maaz-allah

har ek chaukhaT tera hi aastan malum hoti hai

use har ahl-e-dil pahron maze le le ke sunta hai

meri bipta hadis-e-dil-baran malum hoti hai

kaTe hain din balaon ke sahaare jin asiron ke

unhen bijli bhi shaKH-e-ashiyan malum hoti hai

maal-e-zindagani ki haqiqat khul gai jab se

kasak dil ki mata-e-do-jahan malum hoti hai

KHayal-e-aish ki parchhain se bhi dil larazta hai

nigah-e-husn ab kyun mehrban malum hoti hai

KHuda shayad hai mere bhulne wale ba-juz tere

mujhe taKHliq-e-alam raegan malum hoti hai

kisi ki justuju mein 'wajd' us manzil pe pahuncha hun

jahan manzil bhi gard-e-karwan malum hoti hai