tere baghair ajab bazm-e-dil ka aalam hai

tire baġhair ajab bazm-e-dil kā aalam hai

charāġh saiñkaḌoñ jalte haiñ raushnī kam hai

jo jī rahe haiñ unhī ke liye har ik ġham hai

zahe-nasīb ki phūloñ kī zindagī kam hai

qafas se aa.e chaman meñ to bas yahī dekhā

bahār kahte haiñ jis ko ḳhizāñ kā aalam hai

ḳhayāl-e-tark-e-mohabbat kī ḳhair ho yārab

kuchh aaj mast nigāhoñ kī be-ruḳhī kam hai

banā.e haiñ isī shabnam ne saiñkaḌoñ dariyā

nahīñ malāl jo dariyā harīf-e-shabnam hai

kahā ye dil ne sunī guftugū jo nāseh kī

mubālaġha hai bahut is meñ vāqi.a kam hai

bahār aa.e chaman meñ ye intizār na dekh

'shakīl' apne junūñ kī bahār kyā kam hai

tere baghair ajab bazm-e-dil ka aalam hai

charagh sainkaDon jalte hain raushni kam hai

jo ji rahe hain unhi ke liye har ek gham hai

zahe-nasib ki phulon ki zindagi kam hai

qafas se aae chaman mein to bas yahi dekha

bahaar kahte hain jis ko KHizan ka aalam hai

KHayal-e-tark-e-mohabbat ki KHair ho yarab

kuchh aaj mast nigahon ki be-ruKHi kam hai

banae hain isi shabnam ne sainkaDon dariya

nahin malal jo dariya harif-e-shabnam hai

kaha ye dil ne suni guftugu jo naseh ki

mubaalagha hai bahut is mein waqia kam hai

bahaar aae chaman mein ye intizar na dekh

'shakil' apne junun ki bahaar kya kam hai