ترے بغیر گل و نسترن پہ کیا گزری

ترے بغیر گل و نسترن پہ کیا گزری

نہ پوچھ اب کے بہار چمن پہ کیا گزری

مآل جرأت‌ منصور کچھ سہی لیکن

سوال یہ ہے کہ دار و رسن پہ کیا گزری

ہمیں تو ہیں کہ جو برق و شرر سے کھیلے ہیں

ہمیں سے پوچھ رہے ہو چمن پہ کیا گزری

قفس میں آج یہ کیسے چراغ روشن ہیں

الٰہی خیر نہ جانے چمن پہ کیا گزری

پہنچ کے منزل مقصد پہ یہ بھی سوچیں گے

کہ شب روی میں دل راہزن پہ کیا گزری

مجھے شکست نشیمن کا غم نہیں لیکن

یہ سوچتا ہوں کہ اہل چمن پہ کیا گزری

ترقیاں تو زمانے نے کیں بہت ارشدؔ

مگر بتاؤ تو ارباب فن پہ کیا گزری