ترے بغیر میں کتنا ہوں بے قرار نہ پوچھ

ترے بغیر میں کتنا ہوں بے قرار نہ پوچھ

بہار گلشن الفت کا حال زار نہ پوچھ

گیا ہے میرے محلہ سے جب سے بدر منیر

ہے چشم قلب حزیں کیسی زار زار نہ پوچھ

فراق یار میں بستر کی غیر حالت ہے

ہے کتنا بالش مخمل بھی سوگوار نہ پوچھ

شکستہ قلب پہ لگتی ہے چوٹ اے ہمدم

گزر رہی ہے جو دل پر وہ بار بار نہ پوچھ

نکال پھینکا ہے یادوں کی لاش کو دل سے

کہاں بنے گا تمناؤں کا مزار نہ پوچھ

طبیب سمجھا تھا جس کو تھا آستین کا سانپ

شکستہ کتنا ہوا جام اعتبار نہ پوچھ

نشاط و عیش میں ہمدم ہزار ملتے تھے

دکھوں میں کون تھا ساتھی نہ پوچھ یار نہ پوچھ

جہاں پہ شمع فلک ہے وہیں پہ پروانہ

تلاش کر مری محفل مرا دیار نہ پوچھ