tere bayan mein hawala nahin to kuchh bhi nahin

tire bayāñ meñ havāla nahīñ to kuchh bhī nahīñ

mire vajūd kā qissa nahīñ to kuchh bhī nahīñ

vahī sarāpā vahī ḳhāl-o-ḳhad vahī qāmat

nayā badan nayā chehra nahīñ to kuchh bhī nahīñ

falak kī samt faqat dekhne se kyā hogā

tirī nigāh meñ ziina nahīñ to kuchh bhī nahīñ

añdheroñ aur ujāloñ kā raqs-e-bāham hai

ye roz-o-shab kā tamāsha nahīñ to kuchh bhī nahīñ

shu.ūr tīra-zada aur munjamid ehsās

dimāġh-o-dil meñ darīcha nahīñ to kuchh bhī nahīñ

zamīñ pe terī hukūmat hai kū-ba-kū lekin

diloñ meñ terā ilāqa nahīñ to kuchh bhī nahīñ

na sar pe gard na chhāle haiñ paañv meñ 'shāhid'

tire safar kā natīja nahīñ to kuchh bhī nahīñ

tere bayan mein hawala nahin to kuchh bhi nahin

mere wajud ka qissa nahin to kuchh bhi nahin

wahi sarapa wahi KHal-o-KHad wahi qamat

naya badan naya chehra nahin to kuchh bhi nahin

falak ki samt faqat dekhne se kya hoga

teri nigah mein zina nahin to kuchh bhi nahin

andheron aur ujalon ka raqs-e-baham hai

ye roz-o-shab ka tamasha nahin to kuchh bhi nahin

shuur tira-zada aur munjamid ehsas

dimagh-o-dil mein daricha nahin to kuchh bhi nahin

zamin pe teri hukumat hai ku-ba-ku lekin

dilon mein tera ilaqa nahin to kuchh bhi nahin

na sar pe gard na chhaale hain panw mein 'shahid'

tere safar ka natija nahin to kuchh bhi nahin