ترے بیمار غم کی سوز و سامانی نہیں جاتی

ترے بیمار غم کی سوز و سامانی نہیں جاتی

یہ عالم ہے کہ اب صورت بھی پہچانی نہیں جاتی

دل ناداں یہ کیا ضد ہے کہ کھیلوں گا حسینوں میں

ارے کم بخت تیری اب بھی نادانی نہیں جاتی

نہ جانے کس کی زلفوں کا نظارا کر لیا میں نے

کہ میرے دل کی الجھن اور پریشانی نہیں جاتی

وہ لایا جام ساقی شیخ جی تھوڑی سی پی بھی لو

اجی دو چار گھونٹوں سے مسلمانی نہیں جاتی

جو دل دیتا ہے شبرؔ آئینہ رخ حسن والوں کو

سمجھ لو زندگی بھر اس کی حیرانی نہیں جاتی