tere chand jaise ruKH par ye nishan-e-dard kyun hain

tire chāñd jaise ruḳh par ye nishān-e-dard kyuuñ haiñ

tire surḳh ārizoñ ke ye gulāb zard kyuuñ haiñ

tujhe kyā huā hai āḳhir mujhe kam se kam batā to

tirī saañs tez kyuuñ hai tire haath sard kyuuñ haiñ

tujhe nā-pasand jo the vahī be-viqār rahte

jo aziiz the tujhe vo tire dar kī gard kyuuñ haiñ

vo kitāb laao jis meñ hai bayān shān-e-qaumī

mire daur kī ye qaumeñ ba-giraft-e-fard kyuuñ haiñ

mujhe shak guzar rahā hai tirī chāra-sāziyoñ par

ai masīh-e-vaqt batlā ye diloñ meñ dard kyuuñ haiñ

jinheñ yaad the fasāne bahut apne bāzuoñ ke

ai 'alīm' muzmahil se vo dam-e-nabard kyuuñ haiñ

tere chand jaise ruKH par ye nishan-e-dard kyun hain

tere surKH aarizon ke ye gulab zard kyun hain

tujhe kya hua hai aaKHir mujhe kam se kam bata to

teri sans tez kyun hai tere hath sard kyun hain

tujhe na-pasand jo the wahi be-wiqar rahte

jo aziz the tujhe wo tere dar ki gard kyun hain

wo kitab lao jis mein hai bayan shan-e-qaumi

mere daur ki ye qaumen ba-giraft-e-fard kyun hain

mujhe shak guzar raha hai teri chaara-saziyon par

ai masih-e-waqt batla ye dilon mein dard kyun hain

jinhen yaad the fasane bahut apne bazuon ke

ai 'alim' muzmahil se wo dam-e-nabard kyun hain