tere dar ke siwa sajdon ko bahlane kahan jate

tire dar ke sivā sajdoñ ko bahlāne kahāñ jaate

ham āḳhir uqda-e-mushkil ko suljhāne kahāñ jaate

ba-juz dasht-e-mohabbat dil ko bahlāne kahāñ jaate

jinheñ Thukrā diyā tū ne vo dīvāne kahāñ jaate

tirī be-iltifātī kā karam ham par huā varna

dil-e-ġham-āshnā ko ġham se bahlāne kahāñ jaate

mashiyyat rizq pahuñchātī na gar aflāk meñ mujh ko

to mere naam ke likhe hue daane kahāñ jaate

ġhanīmat hai jo rakh lī bekasī kī laaj maujoñ ne

mirī mayyat ko varna log dafnāne kahāñ jaate

ḳhud apnī bastiyāñ vīrān karke josh-e-vahshat meñ

na jaate chāñd par to phir ye dīvāne kahāñ jaate

ajal ko rahm aayā bekasoñ ke haal par 'faizī'

vagarna bazm se uTh kar ye dīvāne kahāñ jaate

tere dar ke siwa sajdon ko bahlane kahan jate

hum aaKHir uqda-e-mushkil ko suljhane kahan jate

ba-juz dasht-e-mohabbat dil ko bahlane kahan jate

jinhen Thukra diya tu ne wo diwane kahan jate

teri be-iltifati ka karam hum par hua warna

dil-e-gham-ashna ko gham se bahlane kahan jate

mashiyyat rizq pahunchati na gar aflak mein mujh ko

to mere nam ke likhe hue dane kahan jate

ghanimat hai jo rakh li bekasi ki laj maujon ne

meri mayyat ko warna log dafnane kahan jate

KHud apni bastiyan viran karke josh-e-wahshat mein

na jate chand par to phir ye diwane kahan jate

ajal ko rahm aaya bekason ke haal par 'faizi'

wagarna bazm se uTh kar ye diwane kahan jate