tere dayar se jins-e-muhaal le aae

tire dayār se jins-e-muhāl le aa.e

javāb laane ga.e aur savāl le aa.e

bahut se log koī tujh sā DhūñDne nikle

majāl kis kī jo terī misāl le aa.e

shikārī dekhtā hī rah gayā ba-hairānī

parinde mil ke uḌe aur jaal le aa.e

visāl hijr siyāsat masā.il-e-duniyā

ġhazal meñ ham bhī ye kyā kyā ḳhayāl le aa.e

sitam-zarīfī hai mushkil pasand logoñ kī

daraḳht kaaT na paa.e to chhāl le aa.e

rulā rulā diyā yāroñ ne aaj phir 'āqib'

ġham-e-firāq meñ zikr-e-visāl le aa.e

tere dayar se jins-e-muhaal le aae

jawab lane gae aur sawal le aae

bahut se log koi tujh sa DhunDne nikle

majal kis ki jo teri misal le aae

shikari dekhta hi rah gaya ba-hairani

parinde mil ke uDe aur jal le aae

visal hijr siyasat masail-e-duniya

ghazal mein hum bhi ye kya kya KHayal le aae

sitam-zarifi hai mushkil pasand logon ki

daraKHt kaT na pae to chhaal le aae

rula rula diya yaron ne aaj phir 'aqib'

gham-e-firaq mein zikr-e-visal le aae