ترے دل میں ہے مصور کوئی صورت دوامی

ترے دل میں ہے مصور کوئی صورت دوامی

کہ تمام نقش اب تک ہیں شہید ناتمامی

میں کچھ اور پوچھتا کیا میں جواب پا چکا تھا

کہ پیام دے کے پلٹا تو خموش تھا پیامی

مجھے دیکھنا ہے اس کو جو تری گلی سے گزرے

بہ قبائے پارسائی بہ لباس نیک نامی

جو بہ چشم نم لبوں پر کسی غمزدہ کے آئے

لرز اس ہنسی سے ظالم وہ ہنسی ہے انتقامی

کوئی اوج مشترک ہو کوئی منظر مساوی

مری بوریا نشینی نہ تری بلند بامی

وہ کہانیاں سناؤں جو سنی نہ ہوں کسی نے

مگر اے شمیمؔ چپ ہوں کہ بھرے تو کوئی حامی