tere firaq ke lamhe guzar hi jaenge

tire firāq ke lamhe guzar hī jā.eñge

kabhī to zaḳhm mire dil ke bhar hī jā.eñge

abhī to josh meñ hai zauq-e-jāda-paimā.ī

kabhī jo hosh meñ aa.e to ghar hī jā.eñge

tirī judā.ī ke lamhe azaab haiñ lekin

tire baġhair bhī ye din guzar hī jā.eñge

ḳhayāl thā ki na aate tumhārī mahfil meñ

ab aa ga.e haiñ to kuchh baat kar hī jā.eñge

azal se duur urūj-o-zavāl qaa.em hai

chaḌhe haiñ aaj jo dariyā utar hī jā.eñge

ḳhayāl-e-ḳhātir-e-ahbāb jo nahīñ rakhte

vo ek roz diloñ se utar hī jā.eñge

kuchh aur ai dil-e-muztar baḌhā de zabt kī lau

urūs-e-shām ke gesū sañvar hī jā.eñge

ajab mizāj ke hāmil haiñ ishq ke maare

jidhar hue haiñ vo rusvā udhar hī jā.eñge

'sirāj' shauq sā kyā koī tarjumāñ hogā

ḳhamosh rah ke bhī ham baat kar hī jā.eñge

tere firaq ke lamhe guzar hi jaenge

kabhi to zaKHm mere dil ke bhar hi jaenge

abhi to josh mein hai zauq-e-jada-paimai

kabhi jo hosh mein aae to ghar hi jaenge

teri judai ke lamhe azab hain lekin

tere baghair bhi ye din guzar hi jaenge

KHayal tha ki na aate tumhaari mahfil mein

ab aa gae hain to kuchh baat kar hi jaenge

azal se dur uruj-o-zawal qaem hai

chaDhe hain aaj jo dariya utar hi jaenge

KHayal-e-KHatir-e-ahbab jo nahin rakhte

wo ek roz dilon se utar hi jaenge

kuchh aur ai dil-e-muztar baDha de zabt ki lau

urus-e-sham ke gesu sanwar hi jaenge

ajab mizaj ke hamil hain ishq ke mare

jidhar hue hain wo ruswa udhar hi jaenge

'siraj' shauq sa kya koi tarjuman hoga

KHamosh rah ke bhi hum baat kar hi jaenge