tere gham se dil shadman dekhta hun

tire ġham se dil shādmāñ dekhtā huuñ

tujhe rāhat-e-jāvedāñ dekhtā huuñ

zamāne kī bargashtagī kā ye 'ālam

ki har shai ko dāman-kashāñ dekhtā huuñ

kabhī bijliyāñ raunaq-e-gulsitāñ thiiñ

shajar aaj be-āshiyāñ dekhtā huuñ

kabhī apnī māyūsiyoñ par qanā'at

kabhī jānib-e-āsmāñ dekhtā huuñ

kabhī ḳhaak kī rif'atoñ par nazar hai

kabhī charḳh kī pastiyāñ dekhtā huuñ

ik andāz-e-vāraftagī hai na pūchho

kise dekhtā huuñ kahāñ dekhtā huuñ

mohabbat kā adnā tasarruf hai 'hirmāñ'

jahāñ maiñ nahīñ huuñ vahāñ dekhtā huuñ

tere gham se dil shadman dekhta hun

tujhe rahat-e-jawedan dekhta hun

zamane ki bargashtagi ka ye 'alam

ki har shai ko daman-kashan dekhta hun

kabhi bijliyan raunaq-e-gulsitan thin

shajar aaj be-ashiyan dekhta hun

kabhi apni mayusiyon par qana'at

kabhi jaanib-e-asman dekhta hun

kabhi KHak ki rif'aton par nazar hai

kabhi charKH ki pastiyan dekhta hun

ek andaz-e-waraftagi hai na puchho

kise dekhta hun kahan dekhta hun

mohabbat ka adna tasarruf hai 'hirman'

jahan main nahin hun wahan dekhta hun