tere gesuon ke sae mein jo ek pal raha hun

tire gesuoñ ke saa.e meñ jo ek pal rahā huuñ

abhī tak hai yaad mujh ko abhī tak bahal rahā huuñ

maiñ vo riñd-e-nau nahīñ huuñ jo zarā sī pī ke bahkūñ

abhī aur aur saaqī ki maiñ phir sambhal rahā huuñ

nahīñ ġham na mil sakegī mujhe shaiḳh terī jannat

mujhe aarzū nahīñ hai na maiñ haath mal rahā huuñ

jo na mere kaam aa.e jo na merī baat maane

maiñ vo dil badal rahā huuñ maiñ vo dil badal rahā huuñ

mujhe jāda-e-talab meñ rah-e-pur-ḳhatar kā kyā ġham

ki qadam jidhar uThe haiñ usī samt chal rahā huuñ

jo girā to phir uThūñgā ki javāñ hai azm merā

mujhe tum na do sahārā maiñ agar phisal rahā huuñ

vo dabā ke merā dāman vo jhukā ke un kī nazreñ

nahīñ bhūltā ye kahnā abhī maiñ bhī chal rahā huuñ

tere gesuon ke sae mein jo ek pal raha hun

abhi tak hai yaad mujh ko abhi tak bahal raha hun

main wo rind-e-nau nahin hun jo zara si pi ke bahkun

abhi aur aur saqi ki main phir sambhal raha hun

nahin gham na mil sakegi mujhe shaiKH teri jannat

mujhe aarzu nahin hai na main hath mal raha hun

jo na mere kaam aae jo na meri baat mane

main wo dil badal raha hun main wo dil badal raha hun

mujhe jada-e-talab mein rah-e-pur-KHatar ka kya gham

ki qadam jidhar uThe hain usi samt chal raha hun

jo gira to phir uThunga ki jawan hai azm mera

mujhe tum na do sahaara main agar phisal raha hun

wo daba ke mera daman wo jhuka ke un ki nazren

nahin bhulta ye kahna abhi main bhi chal raha hun