tere hirman-nasibon ki bhi kya taqdir hai saqi

tire hirmāñ-nasīboñ kī bhī kyā taqdīr hai saaqī

ba-har-sūrat vahī zindāñ vahī zanjīr hai saaqī

sharāre zindagī ke dekhtā huuñ raakh meñ pinhāñ

mire haq meñ ye ḳhāk-e-āshiyāñ iksīr hai saaqī

bahār aa.ī hai gulshan meñ magar mahsūs hotā hai

nazāre sahme sahme haiñ fazā dil-gīr hai saaqī

ḳhush aa.egī bhalā kaise vo tere mai-parastoñ ko

jo ḳhāmoshī harīf-e-nāla-e-shab-gīr hai saaqī

vo āzādī qafas meñ giit jis ke gaa.e jaate the

gulistāñ meñ vahī ab paañv kī zanjīr hai saaqī

bahār aa.ī qafas ke dar khule bādal uThe barse

duā lekin hamārī tishna-e-tāsīr hai saaqī

faqat ik jurm-e-haq-goī ke chalte terī mahfil meñ

tire 'āsif' kī mastī mojib-e-tāzīr hai saaqī

tere hirman-nasibon ki bhi kya taqdir hai saqi

ba-har-surat wahi zindan wahi zanjir hai saqi

sharare zindagi ke dekhta hun rakh mein pinhan

mere haq mein ye KHak-e-ashiyan iksir hai saqi

bahaar aai hai gulshan mein magar mahsus hota hai

nazare sahme sahme hain faza dil-gir hai saqi

KHush aaegi bhala kaise wo tere mai-paraston ko

jo KHamoshi harif-e-nala-e-shab-gir hai saqi

wo aazadi qafas mein git jis ke gae jate the

gulistan mein wahi ab panw ki zanjir hai saqi

bahaar aai qafas ke dar khule baadal uThe barse

dua lekin hamari tishna-e-tasir hai saqi

faqat ek jurm-e-haq-goi ke chalte teri mahfil mein

tere 'asif' ki masti mojib-e-tazir hai saqi