tere husn-e-nazar ka ye bhi ek eajaz hai saqi

tire husn-e-nazar kā ye bhī ik e.ajāz hai saaqī

ki har mai-kash zamīñ par āsmāñ parvāz hai saaqī

ḳhayāl itnā rahe bas apne sāġhar kī pilāne meñ

tirā anjām hai saaqī mirā āġhāz hai saaqī

kahīñ bāham-digar Takrā na jaa.eñ sāġhar-o-mīnā

mai-e-sa-josh is dam mā.il-e-parvāz hai saaqī

jabīn-e-shauq sajda kar kahāñ kā pās-e-rusvā.ī

ḳhushā-vaqte ki sargarm-e-ḳhirām-e-nāz hai saaqī

idhar bhī ik nazar o sab kī jānib dekhne vaale

ki ik riñd-e-ḳharābātī nazar-andāz hai saaqī

kareñ tauba to dil bechain agar pī leñ to rusvā.ī

ajab uljhan meñ apnī mai-kashī kā raaz hai saaqī

sharāb-e-arġhavānī bhī piyūñ maiñ ḳhud to paanī hai

pilā.e tū jo paanī bāda-e-shīrāz hai saaqī

pas-e-tauba mujhe piine meñ āḳhir kyoñ ta.ammul ho

ba-hamdillāh dar-e-tauba abhī tak baaz hai saaqī

vo kyoñ jaane lagā dair-o-haram kī Thokareñ khāne

tire 'afqar' ko tere mai-kade par naaz hai saaqī

tere husn-e-nazar ka ye bhi ek eajaz hai saqi

ki har mai-kash zamin par aasman parwaz hai saqi

KHayal itna rahe bas apne saghar ki pilane mein

tera anjam hai saqi mera aaghaz hai saqi

kahin baham-digar Takra na jaen saghar-o-mina

mai-e-sa-josh is dam mail-e-parwaz hai saqi

jabin-e-shauq sajda kar kahan ka pas-e-ruswai

KHusha-waqte ki sargarm-e-KHiram-e-naz hai saqi

idhar bhi ek nazar o sab ki jaanib dekhne wale

ki ek rind-e-KHarabaati nazar-andaz hai saqi

karen tauba to dil bechain agar pi len to ruswai

ajab uljhan mein apni mai-kashi ka raaz hai saqi

sharab-e-arghawani bhi piyun main KHud to pani hai

pilae tu jo pani baada-e-shiraaz hai saqi

pas-e-tauba mujhe pine mein aaKHir kyon tammul ho

ba-hamdillah dar-e-tauba abhi tak baz hai saqi

wo kyon jaane laga dair-o-haram ki Thokaren khane

tere 'afqar' ko tere mai-kade par naz hai saqi