tere intizar mein kya mila tere etibar ne kya diya

tire intizār meñ kyā milā tire e'tibār ne kyā diyā

kabhī koī zaḳhm tapāñ huā kabhī koī daaġh khilā diyā

ye shab-e-safar bhī vabāl hai na firāq hai na visāl hai

isī shab ne niiñd harām kī isī shab ne ham ko sulā diyā

mire shahr-e-gul mirī arz-e-jāñ kahīñ koī un kā bhī hai nishāñ

tirī be-ḳhayāl havāoñ ne jinheñ rāste se haTā diyā

jise dast-e-zulm chhupā sake na havā-e-jaur bujhā sake

sar-e-rāh-e-manzil-e-zindagī vo charāġh ham ne jalā diyā

yahī ġham garāñ thā so rafta rafta tire surūr-e-ḳhayāl ne

safar-e-hayāt kī mushkilāt ko bhūlnā bhī sikhā diyā

tere intizar mein kya mila tere e'tibar ne kya diya

kabhi koi zaKHm tapan hua kabhi koi dagh khila diya

ye shab-e-safar bhi wabaal hai na firaq hai na visal hai

isi shab ne nind haram ki isi shab ne hum ko sula diya

mere shahr-e-gul meri arz-e-jaan kahin koi un ka bhi hai nishan

teri be-KHayal hawaon ne jinhen raste se haTa diya

jise dast-e-zulm chhupa sake na hawa-e-jaur bujha sake

sar-e-rah-e-manzil-e-zindagi wo charagh hum ne jala diya

yahi gham garan tha so rafta rafta tere surur-e-KHayal ne

safar-e-hayat ki mushkilat ko bhulna bhi sikha diya