tere jalwon mein gum ho kar nishan baqi nahin rahta

tire jalvoñ meñ gum ho kar nishāñ baaqī nahīñ rahtā

nishāñ kaisā ki hastī kā gumāñ baaqī nahīñ rahtā

mohabbat meñ nizām-e-jism-o-jāñ baaqī nahīñ rahtā

ye vo manzil hai jis meñ kārvāñ baaqī nahīñ rahtā

kaheñ sayyād kyā ham us chaman ke rahne vaale haiñ

bahāroñ meñ gulistāñ tak jahāñ baaqī nahīñ rahtā

miTā de apnī hastī imtihāñ-gāh-e-mohabbat meñ

ki is ke baad koī imtihāñ baaqī nahīñ rahtā

tajallī terī jab hotī hai mahv-e-jalva-ārā.ī

to phir jalvoñ se koī āstāñ baaqī nahīñ rahtā

vahāñ pahuñchā diyā soz-e-ġham-e-pinhāñ ne ab ham ko

ki ġham minjumla-e-umr-e-ravāñ baaqī nahīñ rahtā

ab us manzil pe le aa.ī hai merī be-ḳhudī mujh ko

jahāñ farq-e-makāñ-o-lā-makāñ baaqī nahīñ rahtā

mire ā.īna-e-dil kī haqīqat pūchhne vaale

yahāñ aa kar koī rāz-e-nihāñ baaqī nahīñ rahtā

vo duniyā ho lahad ho yā qayāmat ho ki mahshar ho

ġham-e-a.amāl kā ronā kahāñ baaqī nahīñ rahtā

sadā aatī hai rātoñ ko yahī gor-e-ġharībāñ se

charāġh-e-sarhad-e-manzil yahāñ baaqī nahīñ rahtā

bhulā detī hai terī yaad yād-e-mā-sivā dil se

tire hote ḳhayāl-e-dīgarāñ baaqī nahīñ rahtā

jabīn-e-shauq jhuk bhī jā kahāñ kā pās-e-rusvā.ī

ki phir qurb-e-jabīn-o-āstāñ baaqī nahīñ rahtā

mujhe hairat unheñ shikva jabīn-e-shauq sargardāñ

ki sang-e-dar pe sajdoñ kā nishāñ baaqī nahīñ rahtā

jahāñ insāniyat kā ḳhuun ho jazbāt kī rau meñ

vahāñ me.ār-e-taḳhlīq-e-jahāñ baaqī nahīñ rahtā

shahīdān-e-mohabbat kī ajab duniyā hai ai 'afqar'

jahāñ zikr-e-hayāt-e-jāvedāñ baaqī nahīñ rahtā

tere jalwon mein gum ho kar nishan baqi nahin rahta

nishan kaisa ki hasti ka guman baqi nahin rahta

mohabbat mein nizam-e-jism-o-jaan baqi nahin rahta

ye wo manzil hai jis mein karwan baqi nahin rahta

kahen sayyaad kya hum us chaman ke rahne wale hain

bahaaron mein gulistan tak jahan baqi nahin rahta

miTa de apni hasti imtihan-gah-e-mohabbat mein

ki is ke baad koi imtihan baqi nahin rahta

tajalli teri jab hoti hai mahw-e-jalwa-arai

to phir jalwon se koi aastan baqi nahin rahta

wahan pahuncha diya soz-e-gham-e-pinhan ne ab hum ko

ki gham minjumla-e-umr-e-rawan baqi nahin rahta

ab us manzil pe le aai hai meri be-KHudi mujh ko

jahan farq-e-makan-o-la-makan baqi nahin rahta

mere aaina-e-dil ki haqiqat puchhne wale

yahan aa kar koi raaz-e-nihan baqi nahin rahta

wo duniya ho lahad ho ya qayamat ho ki mahshar ho

gham-e-amal ka rona kahan baqi nahin rahta

sada aati hai raaton ko yahi gor-e-ghariban se

charagh-e-sarhad-e-manzil yahan baqi nahin rahta

bhula deti hai teri yaad yaad-e-ma-siwa dil se

tere hote KHayal-e-digaran baqi nahin rahta

jabin-e-shauq jhuk bhi ja kahan ka pas-e-ruswai

ki phir qurb-e-jabin-o-astan baqi nahin rahta

mujhe hairat unhen shikwa jabin-e-shauq sargardan

ki sang-e-dar pe sajdon ka nishan baqi nahin rahta

jahan insaniyat ka KHun ho jazbaat ki rau mein

wahan mear-e-taKHliq-e-jahan baqi nahin rahta

shahidan-e-mohabbat ki ajab duniya hai ai 'afqar'

jahan zikr-e-hayat-e-jawedan baqi nahin rahta