tere jamal ka partaw mere bayan mein kahan

tire jamāl kā partav mire bayāñ meñ kahāñ

vo dilkashī mirī be-rabt dāstāñ meñ kahāñ

kahāñ vo phuul jinheñ zīnat-e-chaman kahiye

harī bharī koī ab shāḳh gulsitāñ meñ kahāñ

sukūn-e-dil kī talab kis jagah mujhe laa.ī

sukūn-e-dil bhalā is shahr-e-be-amāñ meñ kahāñ

ḳhud apne ghar kā pata pūchhnā paḌā mujh ko

bahak kar aa gayā ujḌe hue makāñ meñ kahāñ

vo rut ga.ī mirī dīvāngī kī umr ke saath

bahār jaisī fazā mausam-e-ḳhizāñ meñ kahāñ

koī talab na koī aarzū na koī havas

ye be-niyāzī-e-fitrat bhī ins-o-jāñ meñ kahāñ

uThā.e phirtā hai kyoñ bojh zindagī kā 'asar'

sakat ab itnī tire jism-e-nā-tavāñ meñ kahāñ

tere jamal ka partaw mere bayan mein kahan

wo dilkashi meri be-rabt dastan mein kahan

kahan wo phul jinhen zinat-e-chaman kahiye

hari bhari koi ab shaKH gulsitan mein kahan

sukun-e-dil ki talab kis jagah mujhe lai

sukun-e-dil bhala is shahr-e-be-aman mein kahan

KHud apne ghar ka pata puchhna paDa mujh ko

bahak kar aa gaya ujDe hue makan mein kahan

wo rut gai meri diwangi ki umr ke sath

bahaar jaisi faza mausam-e-KHizan mein kahan

koi talab na koi aarzu na koi hawas

ye be-niyazi-e-fitrat bhi ins-o-jaan mein kahan

uThae phirta hai kyon bojh zindagi ka 'asar'

sakat ab itni tere jism-e-na-tawan mein kahan