tere karam ki hui ek nigah dam dam KHair

tire karam kī huī ik nigāh dam dam ḳhair

mire saḳhī ai mire bādshāh dam dam ḳhair

yūñhī rahe mire murshid sadā hisār tirā

mire habīb mire ḳhair-ḳhvāh dam dam ḳhair

zahe-nasīb ki sarsabz kar diyā us ne

karam tirā jo huā be-panāh dam dam ḳhair

bas ik nazar ho kabhī is ġhulām kī jānib

sadā raheñ ye tire 'izz-o-jāh dam dam ḳhair

zamīñ kī gardisheñ tere hī izn par mauqūf

tavāf meñ haiñ tire mehr-o-māh dam dam ḳhair

hai mujh faqīr kī daa.im du'ā rahe qaa.em

tirā ġhurūr mire kaj-kulāh dam dam ḳhair

sabhī pe faiz tirī chashm-e-iltifāt kā hai

idhar bhī chashm-e-karam gāh-gāh dam dam ḳhair

tire karam se faqat mo'tabar huā hai suḳhan

'ināyateñ ye tirī vaah vaah dam dam ḳhair

haiñ kis ke naam kī 'nasrīn' nisbateñ tū ne

kahāñ pe jā ke rakhī rasm-o-rāh dam dam ḳhair

tere karam ki hui ek nigah dam dam KHair

mere saKHi ai mere baadshah dam dam KHair

yunhi rahe mere murshid sada hisar tera

mere habib mere KHair-KHwah dam dam KHair

zahe-nasib ki sarsabz kar diya us ne

karam tera jo hua be-panah dam dam KHair

bas ek nazar ho kabhi is ghulam ki jaanib

sada rahen ye tere 'izz-o-jah dam dam KHair

zamin ki gardishen tere hi izn par mauquf

tawaf mein hain tere mehr-o-mah dam dam KHair

hai mujh faqir ki daim du'a rahe qaem

tera ghurur mere kaj-kulah dam dam KHair

sabhi pe faiz teri chashm-e-iltifat ka hai

idhar bhi chashm-e-karam gah-gah dam dam KHair

tere karam se faqat mo'tabar hua hai suKHan

'inayaten ye teri wah wah dam dam KHair

hain kis ke nam ki 'nasrin' nisbaten tu ne

kahan pe ja ke rakhi rasm-o-rah dam dam KHair