ترے کرم کی ہوئی اک نگاہ دم دم خیر

ترے کرم کی ہوئی اک نگاہ دم دم خیر

مرے سخی اے مرے بادشاہ دم دم خیر

یوںہی رہے مرے مرشد سدا حصار ترا

مرے حبیب مرے خیر خواہ دم دم خیر

زہے نصیب کہ سرسبز کر دیا اس نے

کرم ترا جو ہوا بے پناہ دم دم خیر

بس اک نظر ہو کبھی اس غلام کی جانب

سدا رہیں یہ ترے عز و جاہ دم دم خیر

زمیں کی گردشیں تیرے ہی اذن پر موقوف

طواف میں ہیں ترے مہر و ماہ دم دم خیر

ہے مجھ فقیر کی دائم دعا رہے قائم

ترا غرور مرے کج کلاہ دم دم خیر

سبھی پہ فیض تری چشم التفات کا ہے

ادھر بھی چشم کرم گاہ گاہ دم دم خیر

ترے کرم سے فقط معتبر ہوا ہے سخن

عنایتیں یہ تری واہ واہ دم دم خیر

ہیں کس کے نام کی نسرینؔ نسبتیں تو نے

کہاں پہ جا کے رکھی رسم و راہ دم دم خیر