tere karam ne wo diwangi ata ki hai

tire karam ne vo dīvāngī atā kī hai

ki jis ne terī hī tash.hīr jā-ba-jā kī hai

abhī se aap kī āñkhoñ meñ aa ga.e aañsū

abhī to maiñ ne fasāne kī ibtidā kī hai

rahe to ham rahe dār-o-rasan ke dīvāne

hamīñ ne parvarish-e-jazba-e-anā kī hai

adā-shanās-e-mohabbat ko haq hai jiine kā

hayāt hai to dil-e-dard-āshnā kī hai

jabīñ ko juzv-e-dar-e-yār karke chhoḌ diyā

namāz maiñ ne adā kī to yuuñ adā kī hai

huzūr apnā safīna na Dūbtā hargiz

yaqīn kījiye sāzish ye nāḳhudā kī hai

junūn-e-sajda-tarāzī meñ kis ko hosh 'afsar'

kahāñ namāz paḌhī aur kab duā kī hai

tere karam ne wo diwangi ata ki hai

ki jis ne teri hi tashhir ja-ba-ja ki hai

abhi se aap ki aankhon mein aa gae aansu

abhi to main ne fasane ki ibtida ki hai

rahe to hum rahe dar-o-rasan ke diwane

hamin ne parwarish-e-jazba-e-ana ki hai

ada-shanas-e-mohabbat ko haq hai jine ka

hayat hai to dil-e-dard-ashna ki hai

jabin ko juzw-e-dar-e-yar karke chhoD diya

namaz main ne ada ki to yun ada ki hai

huzur apna safina na Dubta hargiz

yaqin kijiye sazish ye naKHuda ki hai

junun-e-sajda-taraazi mein kis ko hosh 'afsar'

kahan namaz paDhi aur kab dua ki hai