tere karam se teri be-ruKHi se kya lena

tire karam se tirī be-ruḳhī se kyā lenā

mire ḳhulūs-e-vafā ko kisī se kyā lenā

sukūn-e-qalb na āsā.ish-e-hayāt nasīb

ye zindagī hai to is zindagī se kyā lenā

tū apnī vaz.a ko rusvā-e-arz-e-hāl na kar

kisī ko tere ġham-e-be-basī se kyā lenā

ḳharāb-e-zīst huuñ lekin tirī ḳhushī ke sivā

tire nisār mujhe zindagī se kyā lenā

tū merī ḳhū-e-mohabbat badal nahīñ saktā

zamāne mujh ko tirī be-ruḳhī se kyā lenā

sitam hai dam jo mirī dostī kā bharte the

vo kah rahe haiñ tirī dostī se kyā lenā

hamīd asl meñ ik ġham ko hai sabāt yahāñ

jise davām nahīñ us ḳhushī se kyā lenā

tere karam se teri be-ruKHi se kya lena

mere KHulus-e-wafa ko kisi se kya lena

sukun-e-qalb na aasaish-e-hayat nasib

ye zindagi hai to is zindagi se kya lena

tu apni waza ko ruswa-e-arz-e-haal na kar

kisi ko tere gham-e-be-basi se kya lena

KHarab-e-zist hun lekin teri KHushi ke siwa

tere nisar mujhe zindagi se kya lena

tu meri KHu-e-mohabbat badal nahin sakta

zamane mujh ko teri be-ruKHi se kya lena

sitam hai dam jo meri dosti ka bharte the

wo kah rahe hain teri dosti se kya lena

hamid asl mein ek gham ko hai sabaat yahan

jise dawam nahin us KHushi se kya lena