tere KHayal ke jab shamiyane lagte hain

tire ḳhayāl ke jab shāmiyāne lagte haiñ

suḳhan ke paañv mire laḌkhaḌāne lagte haiñ

jo ek dast-e-burīda savād-e-shauq meñ hai

alam uThā.e hue us ke shāne lagte haiñ

maiñ dasht-e-hū kī taraf jab uḌaan bhartā huuñ

tirī sadā ke shajar phir bulāne lagte haiñ

ḳhabar bhī hai tujhe is daftar-e-mohabbat ko

jalāne jalne meñ kyā kyā zamāne lagte haiñ

ye gard hai mirī āñkhoñ meñ kin zamānoñ kī

na.e libās bhī ab to purāne lagte haiñ

tumhāre meva-e-lab ko nigah se chhūte hī

ajiib lazzat-e-nāyāb paane lagte haiñ

jo sansanātā hai kuufa o nainvā kā ḳhayāl

gulu-e-jāñ kī taraf tiir aane lagte haiñ

tere KHayal ke jab shamiyane lagte hain

suKHan ke panw mere laDkhaDane lagte hain

jo ek dast-e-burida sawad-e-shauq mein hai

alam uThae hue us ke shane lagte hain

main dasht-e-hu ki taraf jab uDan bharta hun

teri sada ke shajar phir bulane lagte hain

KHabar bhi hai tujhe is daftar-e-mohabbat ko

jalane jalne mein kya kya zamane lagte hain

ye gard hai meri aankhon mein kin zamanon ki

nae libas bhi ab to purane lagte hain

tumhaare mewa-e-lab ko nigah se chhute hi

ajib lazzat-e-nayab pane lagte hain

jo sansanata hai kufa o nainwa ka KHayal

gulu-e-jaan ki taraf tir aane lagte hain