tere KHayal se dilchaspiyan banate hain

tire ḳhayāl se dilchaspiyāñ banāte haiñ

varaq pe dil ke chalo titliyāñ banāte haiñ

safar hayāt kā behad hasīn guzregā

ham e'tibār kī pagDanDiyāñ banāte haiñ

maiñ jāntā huuñ ye dariyā nahīñ hai sahrā hai

to ret par hī chalo machhliyāñ banāte haiñ

uThā hī lī hai jo dīvār tum ne āñgan meñ

to bhaa.ī is meñ chalo khiḌkiyāñ banāte haiñ

khulegā is tarah qismat kā band darvāza

tapā ke azm ko ham chābiyāñ banāte haiñ

vo dauḌne kā tasavvur bhī kar nahīñ sakte

jo apne zehn meñ baisākhiyāñ banāte haiñ

hamārī raah meñ hotī hai jo kabhī haa.il

usī chaTān se ab sīḌhiyāñ banāte haiñ

tere KHayal se dilchaspiyan banate hain

waraq pe dil ke chalo titliyan banate hain

safar hayat ka behad hasin guzrega

hum e'tibar ki pagDanDiyan banate hain

main jaanta hun ye dariya nahin hai sahra hai

to ret par hi chalo machhliyan banate hain

uTha hi li hai jo diwar tum ne aangan mein

to bhai is mein chalo khiDkiyan banate hain

khulega is tarah qismat ka band darwaza

tapa ke azm ko hum chabiyan banate hain

wo dauDne ka tasawwur bhi kar nahin sakte

jo apne zehn mein baisakhiyan banate hain

hamari rah mein hoti hai jo kabhi hail

usi chaTan se ab siDhiyan banate hain