tere munh chhupate hi phir mujhe KHabar apni kuchh na zari rahi

tire muñh chhupāte hī phir mujhe ḳhabar apnī kuchh na zarī rahī

na firāq thā na visāl thā rahī ik to be-ḳhabarī rahī

tū hamesha ai but-e-mah-laqā rahā mahv apnī hī shakl kā

tire aks-e-husn kī ārasī tire sāmne hī dharī rahī

tire ahd-e-husn meñ yak zamāñ na junūñ se mujh ko milī amaañ

vahī naala aur vahī fuġhāñ vahī mashq-e-jāma-darī rahī

koī hove kyūñke na tañg-dil tire dil meñ ai but-e-sañg-dil

asar aah apnī ne ye kyā ki rahīn-e-be-asarī rahī

na ḳhat aa.e par bhī kamī paḌī tirī shān-e-husn meñ yak zarī

vahī qad kī fitnagarī rahī vahī ruḳh kī jalvagarī rahī

kabhī dil liyā kabhī diiñ liyā kabhī zar liyā kabhī sar liyā

yūñhī apnī muft-dahī rahī vahī us kī muft-barī rahī

na kamāl-e-auj se tū girā kabhī fikr-e-sher meñ 'mus.hafī'

ġhazal aur bhī kahī tū ne gar vahī terī tez-parī rahī

tere munh chhupate hi phir mujhe KHabar apni kuchh na zari rahi

na firaq tha na visal tha rahi ek to be-KHabari rahi

tu hamesha ai but-e-mah-laqa raha mahw apni hi shakl ka

tere aks-e-husn ki aarasi tere samne hi dhari rahi

tere ahd-e-husn mein yak zaman na junun se mujh ko mili aman

wahi nala aur wahi fughan wahi mashq-e-jama-dari rahi

koi howe kyunke na tang-dil tere dil mein ai but-e-sang-dil

asar aah apni ne ye kya ki rahin-e-be-asari rahi

na KHat aae par bhi kami paDi teri shan-e-husn mein yak zari

wahi qad ki fitnagari rahi wahi ruKH ki jalwagari rahi

kabhi dil liya kabhi din liya kabhi zar liya kabhi sar liya

yunhi apni muft-dahi rahi wahi us ki muft-bari rahi

na kamal-e-auj se tu gira kabhi fikr-e-sher mein 'mushafi'

ghazal aur bhi kahi tu ne gar wahi teri tez-pari rahi