tere nam se mujhe ishq hai tera kya nishan hai KHabar nahin

tire naam se mujhe ishq hai tirā kyā nishāñ hai ḳhabar nahīñ

hai ḳhabar bhī gar to isī qadar tū kahāñ nahīñ tū kidhar nahīñ

kabhī jā ke koh meñ ghir gayā kabhī jā ke dasht basā liyā

jise lā-makāñ kī ho justujū kahīñ us kā ghar nahīñ dar nahīñ

ġham-e-zindagī bhī luTā diyā zahe jis ne rāh-e-firāq meñ

jise apne tan kā na hosh ho vo hai aur koī bashar nahīñ

mujhe mast-e-jām-e-sharāb kar na tū ruḳh ko zer-e-naqāb kar

kise be-ḳhudī meñ ye hosh ho tirā jalva shām-o-sahar nahīñ

koī dekhe 'armāñ' kī bebasī hai ajiib hālat-e-be-kasī

nahīñ zabt se koī fā.eda kare aah to bhī asar nahīñ

tere nam se mujhe ishq hai tera kya nishan hai KHabar nahin

hai KHabar bhi gar to isi qadar tu kahan nahin tu kidhar nahin

kabhi ja ke koh mein ghir gaya kabhi ja ke dasht basa liya

jise la-makan ki ho justuju kahin us ka ghar nahin dar nahin

gham-e-zindagi bhi luTa diya zahe jis ne rah-e-firaq mein

jise apne tan ka na hosh ho wo hai aur koi bashar nahin

mujhe mast-e-jam-e-sharab kar na tu ruKH ko zer-e-naqab kar

kise be-KHudi mein ye hosh ho tera jalwa sham-o-sahar nahin

koi dekhe 'arman' ki bebasi hai ajib haalat-e-be-kasi

nahin zabt se koi faeda kare aah to bhi asar nahin