tere naqsh dil se miTane chala hun

tire naqsh dil se miTāne chalā huuñ

maiñ taqdīr phir āzmāne chalā huuñ

jo tum ne likhe the mohabbat bhare ḳhat

vo gangā meñ saare bahāne chalā huuñ

maiñ ġhamgīn rah ke jalūñ aur kitnā

maiñ ḳhush rah ke us ko jalāne chalā huuñ

nahīñ khel bigḌegā ab koī merā

maiñ ab saare hāsid bhagāne chalā huuñ

nayā ḳhol chehre par apne chaḌhā ke

maiñ lailā ko majnūñ banāne chalā huuñ

raqīboñ se ḳhud hī karegā vo nafrat

maiñ ik daam aisā bichhāne chalā huuñ

jaleñge bhuneñge mire saare dushman

maiñ ik aag aisī lagāne chalā huuñ

kisī aur kā us ko hone na dūñgā

ye paimān apnā nibhāne chalā huuñ

use dekhte haiñ jo mailī nazar se

maiñ sar un ke tan se uḌāne chalā huuñ

use sirf apnā banā kar maiñ 'dīpak'

jahāñ bhar se jhagḌā miTāne chalā huuñ

tere naqsh dil se miTane chala hun

main taqdir phir aazmane chala hun

jo tum ne likhe the mohabbat bhare KHat

wo ganga mein sare bahane chala hun

main ghamgin rah ke jalun aur kitna

main KHush rah ke us ko jalane chala hun

nahin khel bigDega ab koi mera

main ab sare hasid bhagane chala hun

naya KHol chehre par apne chaDha ke

main laila ko majnun banane chala hun

raqibon se KHud hi karega wo nafrat

main ek dam aisa bichhane chala hun

jalenge bhunenge mere sare dushman

main ek aag aisi lagane chala hun

kisi aur ka us ko hone na dunga

ye paiman apna nibhane chala hun

use dekhte hain jo maili nazar se

main sar un ke tan se uDane chala hun

use sirf apna bana kar main 'dipak'

jahan bhar se jhagDa miTane chala hun