ترے نظام کو جب چاہے گا بدل دے گا

ترے نظام کو جب چاہے گا بدل دے گا

میاں یہ وقت ہے بگڑا تو پھر کچل دے گا

جہاں بھی جاؤ محبت کے بیج بو دینا

کہیں تو پیڑ اگے گا کہیں تو پھل دے گا

برا بھلا نہ کہو اس غریب بادل کو

خدا نے چاہا تو اک روز یہ بھی جل دے گا

کسی فقیر کے پیروں میں باندھ مت بیڑی

محل کو چھوڑ کے وہ جھونپڑی میں چل دے گا

کہاں خبر تھی کلی کو کہ باغ کا مالی

کرے گا اس پہ ستم اور پھر مسل دے گا

کبھی نہ کہنا تو شادؔ اس سے راز کی باتیں

یہاں سنے گا وہاں جا کے وہ اگل دے گا