ترے قدموں پہ ڈالی زندگی ہے

ترے قدموں پہ ڈالی زندگی ہے

بالآخر تو بنا لی زندگی ہے

ہماری لاابالی زندگی ہے

تمناؤں سے خالی زندگی ہے

ہماری اک جیالی زندگی ہے

مؤثر اور جلالی زندگی ہے

ازل سے لے کر آئے درد مندی

ہماری درد والی زندگی ہے

اسے اے موت ہاتھوں ہاتھ لینا

بڑے نازوں سے پالی زندگی ہے

بڑھی جاتی ہے از خود جانب مرگ

بڑی ہی بھولی بھالی زندگی ہے

خدا نے آدمی سے تنگ آ کر

زمیں پر سے اٹھا لی زندگی ہے

ہے دل مسرور تو دنیا منور

وگرنہ رات کالی زندگی ہے

قضا سے اے امرؔ یوں بے خبر ہو

کہ جیسے لا زوالی زندگی ہے