tere qadmon pe la kar Dal di hai zindagi humne

tire qadmoñ pe lā kar Daal dī hai zindagī ham ne

yahī to zindagī meñ baat kī hai kaam kī ham ne

kahāñ kī 'āshiqī kaisī mohabbat dil kā aanā kyā

havas kā naam mil kar rakh liyā hai 'āshiqī ham ne

ufuq meñ jab bhī dekhā āsmāñ ko sar-nigūñ dekhā

hamesha ḳhaak par dekhī jabīn-e-bartarī ham ne

na karte un se iz.hār-e-tamannā ham to achchhā thā

tamanna to gañvā.ī thī gañvā.ī baat bhī ham ne

nahīñ kaafī barā.e-efan charāġh-e-shab jalānā hī

jalā kar apnā dil duniyā ko dī hai raushnī ham ne

tumhārī bazm meñ har do taraf thī ek majbūrī

na tum ne mad-bharī āñkheñ uThā.īñ aur na pī ham ne

panaptī aarzū kī shāḳh is māhaul meñ kyūñkar

takalluf hī ravā rakkhā kabhī tum ne kabhī ham ne

ḳhabar kyā thī ki mustaqbil abhī kyā kuchh dikhā.egā

ye samjhe the ki har pahlū se duniyā dekh lī ham ne

'amar' ye vaj.h kam hai dushmanoñ ke soz-e-pinhāñ kī

ki jis mahfil meñ vo ukhḌe hamesha daad lī ham ne

tere qadmon pe la kar Dal di hai zindagi hum ne

yahi to zindagi mein baat ki hai kaam ki hum ne

kahan ki 'ashiqi kaisi mohabbat dil ka aana kya

hawas ka nam mil kar rakh liya hai 'ashiqi hum ne

ufuq mein jab bhi dekha aasman ko sar-nigun dekha

hamesha KHak par dekhi jabin-e-bartari hum ne

na karte un se izhaar-e-tamanna hum to achchha tha

tamanna to ganwai thi ganwai baat bhi hum ne

nahin kafi barae-efan charagh-e-shab jalana hi

jala kar apna dil duniya ko di hai raushni hum ne

tumhaari bazm mein har do taraf thi ek majburi

na tum ne mad-bhari aankhen uThain aur na pi hum ne

panapti aarzu ki shaKH is mahaul mein kyunkar

takalluf hi rawa rakkha kabhi tum ne kabhi hum ne

KHabar kya thi ki mustaqbil abhi kya kuchh dikhaega

ye samjhe the ki har pahlu se duniya dekh li hum ne

'amar' ye wajh kam hai dushmanon ke soz-e-pinhan ki

ki jis mahfil mein wo ukhDe hamesha dad li hum ne