ترے رخ کو جب اے صنم دیکھتے ہیں

ترے رخ کو جب اے صنم دیکھتے ہیں

خدا کو خدا کی قسم دیکھتے ہیں

تمہیں دیکھتے ہوں تو دیدے ہی پھوٹیں

بتو شان مولیٰ کو ہم دیکھتے ہیں

گلہ غیر کا کیا عزیزوں سے اپنے

نہ دشمن بھی دیکھے جو ہم دیکھتے ہیں

ملا کرتے ہیں سب سے ہم جھک کے دائم

کماں کی طرح خود میں خم دیکھتے ہیں

زمانے نے کعبہ کلیسا میں دیکھا

مگر اس کو اس دل میں ہم دیکھتے ہیں

چڑھا لیتے ہیں سب تبرک سمجھ کر

نہ وسکی نہ ٹھرا نہ رم دیکھتے ہیں

مٹا دیتے ہیں اس کو چاقو سے اصغرؔ

مرا نام جس جا رقم دیکھتے ہیں