tere shabab ka kuchh kuchh nikhaar baqi hai

tire shabāb kā kuchh kuchh nikhār baaqī hai

bahār jā chukī rang-e-bahār baaqī hai

vo Dhal chuke haiñ magar un se pyaar baaqī hai

kabhī jo pī thī usī kā ḳhumār baaqī hai

ba-shakl-e-gul ġham-e-jānāñ to ho gayā ruḳhsat

ḳhizāñ kī tarah ġham-e-rozgār baaqī hai

jo mere dil pe lagāyā thā zaḳhm yāroñ ne

ga.e vo yaar magar naqsh-e-yār baaqī hai

abhī se chhoḌ ke gulshan vo jā rahe haiñ kahāñ

abhī to raunaq-e-fasl-e-bahār baaqī hai

na mai-kada hai na vo shaġhl-e-mai na vo saaqī

bas ek zindagī-e-nāgavār baaqī hai

ba-rāh-e-dasht koī qāfila guzar to gayā

magar fazā meñ abhī tak ġhubār baaqī hai

jahāñ shabāb meñ ulfat ke khel khele the

vo din guzar ga.e lekin dayār baaqī hai

tamām āsare ek ek kar ke TuuT ga.e

umīd-e-rahmat-e-parvardigār baaqī hai

vo bazm-e-nāz kahāñ aur kahāñ vo jazba-e-shauq

ab ek apnā dil-e-sogvār baaqī hai

ga.e vo din ki mohabbat thī bhā.ī-chāra thā

'musavvir' ab to faqat intishār baaqī hai

tere shabab ka kuchh kuchh nikhaar baqi hai

bahaar ja chuki rang-e-bahaar baqi hai

wo Dhal chuke hain magar un se pyar baqi hai

kabhi jo pi thi usi ka KHumar baqi hai

ba-shakl-e-gul gham-e-jaanan to ho gaya ruKHsat

KHizan ki tarah gham-e-rozgar baqi hai

jo mere dil pe lagaya tha zaKHm yaron ne

gae wo yar magar naqsh-e-yar baqi hai

abhi se chhoD ke gulshan wo ja rahe hain kahan

abhi to raunaq-e-fasl-e-bahaar baqi hai

na mai-kada hai na wo shaghl-e-mai na wo saqi

bas ek zindagi-e-nagawar baqi hai

ba-rah-e-dasht koi qafila guzar to gaya

magar faza mein abhi tak ghubar baqi hai

jahan shabab mein ulfat ke khel khele the

wo din guzar gae lekin dayar baqi hai

tamam aasare ek ek kar ke TuT gae

umid-e-rahmat-e-parwardigar baqi hai

wo bazm-e-naz kahan aur kahan wo jazba-e-shauq

ab ek apna dil-e-sogwar baqi hai

gae wo din ki mohabbat thi bhai-chaara tha

'musawwir' ab to faqat intishaar baqi hai