ترے شباب کا کچھ کچھ نکھار باقی ہے

ترے شباب کا کچھ کچھ نکھار باقی ہے

بہار جا چکی رنگ بہار باقی ہے

وہ ڈھل چکے ہیں مگر ان سے پیار باقی ہے

کبھی جو پی تھی اسی کا خمار باقی ہے

بشکل گل غم جاناں تو ہو گیا رخصت

خزاں کی طرح غم روزگار باقی ہے

جو میرے دل پہ لگایا تھا زخم یاروں نے

گئے وہ یار مگر نقش یار باقی ہے

ابھی سے چھوڑ کے گلشن وہ جا رہے ہیں کہاں

ابھی تو رونق فصل بہار باقی ہے

نہ میکدہ ہے نہ وہ شغل مے نہ وہ ساقی

بس ایک زندگیٔ ناگوار باقی ہے

بہ راہ دشت کوئی قافلہ گزر تو گیا

مگر فضا میں ابھی تک غبار باقی ہے

جہاں شباب میں الفت کے کھیل کھیلے تھے

وہ دن گزر گئے لیکن دیار باقی ہے

تمام آسرے ایک ایک کر کے ٹوٹ گئے

امید رحمت پروردگار باقی ہے

وہ بزم ناز کہاں اور کہاں وہ جذبۂ شوق

اب ایک اپنا دل سوگوار باقی ہے

گئے وہ دن کہ محبت تھی بھائی چارہ تھا

مصورؔ اب تو فقط انتشار باقی ہے