tere sitam pe qanaat na ki to kuchh na kiya

tire sitam pe qanā.at na kī to kuchh na kiyā

tamām umr mohabbat na kī to kuchh na kiyā

ye dekh kar ki sukūñ se guzar rahī hai hayāt

tirī nazar ne sharārat na kī to kuchh na kiyā

ġham ik atā hai magar tū ne ai dil-e-nādāñ

bajā.e shukr shikāyat na kī to kuchh na kiyā

burā na maan ki dastūr ke ḳhilāf nahīñ

jo dostī meñ adāvat na kī to kuchh na kiyā

mizāj pūchhne vaale mirā qusūr muaaf

tavajjohāt kī zahmat na kī to kuchh na kiyā

vo chāhte haiñ to ham jaan nazr kar deñge

jo yuuñ bhī sharh-e-mohabbat na kī to kuchh na kiyā

qadam-qadam pe ye āvāz sun rahā huuñ maiñ

vafā kī raah meñ himmat na kī to kuchh na kiyā

abhī to ḳhair haram kī talāsh hai mujh ko

tire qadam kī ziyārat na kī to kuchh na kiyā

jabīn-e-shauq jhukā deñge pā-e-sāqī par

jo mai-kade meñ ibādat na kī to kuchh na kiyā

tere sitam pe qanaat na ki to kuchh na kiya

tamam umr mohabbat na ki to kuchh na kiya

ye dekh kar ki sukun se guzar rahi hai hayat

teri nazar ne shararat na ki to kuchh na kiya

gham ek ata hai magar tu ne ai dil-e-nadan

bajae shukr shikayat na ki to kuchh na kiya

bura na man ki dastur ke KHilaf nahin

jo dosti mein adawat na ki to kuchh na kiya

mizaj puchhne wale mera qusur muaf

tawajjohat ki zahmat na ki to kuchh na kiya

wo chahte hain to hum jaan nazr kar denge

jo yun bhi sharh-e-mohabbat na ki to kuchh na kiya

qadam-qadam pe ye aawaz sun raha hun main

wafa ki rah mein himmat na ki to kuchh na kiya

abhi to KHair haram ki talash hai mujh ko

tere qadam ki ziyarat na ki to kuchh na kiya

jabin-e-shauq jhuka denge pa-e-saqi par

jo mai-kade mein ibaadat na ki to kuchh na kiya