tere taqazon pe chehre badal raha hun main

tire taqāzoñ pe chehre badal rahā huuñ maiñ

na.e zamāne tire saath chal rahā huuñ maiñ

charāġh-e-āḳhir-e-shab huuñ magar abhī sūraj

sukūn se tū nikalnā ki jal rahā huuñ maiñ

ye chāhtā huuñ kī har ruḳh se dekh luuñ duniyā

ye zāviye jo nazar ke badal rahā huuñ maiñ

na.ī havā.eñ abhī sab gharoñ tak aa.ī nahīñ

abhī to haath kā pañkhā hī jhal rahā huuñ maiñ

mire nashe mujhe ab laḌkhaḌāne mat denā

sharāb-ḳhāne se bāhar nikal rahā huuñ maiñ

zarā sā vaqt hai aur duur merī manzil hai

isī liye to bahut tez chal rahā huuñ maiñ

tere taqazon pe chehre badal raha hun main

nae zamane tere sath chal raha hun main

charagh-e-aKHir-e-shab hun magar abhi suraj

sukun se tu nikalna ki jal raha hun main

ye chahta hun ki har ruKH se dekh lun duniya

ye zawiye jo nazar ke badal raha hun main

nai hawaen abhi sab gharon tak aai nahin

abhi to hath ka pankha hi jhal raha hun main

mere nashe mujhe ab laDkhaDane mat dena

sharab-KHane se bahar nikal raha hun main

zara sa waqt hai aur dur meri manzil hai

isi liye to bahut tez chal raha hun main