tere yaqin pe humne yaqin yar kiya

tire yaqīn pe ham ne yaqīn yaar kiyā

na ho rahā thā hameñ phir bhī bār-bār kiyā

namī vo aañkh meñ raushan huī hai muddat baa'd

namī ki jis kā azal se hai intizār kiyā

dilāsā de ke na laġhzish ko tū gunāh banā

mujhe zarā bhī nadāmat nahīñ ki pyaar kiyā

zamīñ rahī na rahā āsmāñ bharose kā

ḳhudā kī zaat pe jis din se e.atibār kiyā

ḳhirad to ishq ko ḳhātir meñ hī nahīñ laatā

qarār dil ko diyā dil hī be-qarār kiyā

chale haiñ silsile jab se tujhe manāne ke

hameñ hamārī anā ne hī sharmsār kiyā

tirā vo rāz-e-nihāñ aaj bhī nihāñ hī hai

ye baat aur ki tū ne to āshkār kiyā

mile koī bhī hañsī rahtī hai laboñ pe mire

ajiib lahja udāsī ne iḳhtiyār kiyā

tere yaqin pe hum ne yaqin yar kiya

na ho raha tha hamein phir bhi bar-bar kiya

nami wo aankh mein raushan hui hai muddat ba'd

nami ki jis ka azal se hai intizar kiya

dilasa de ke na laghzish ko tu gunah bana

mujhe zara bhi nadamat nahin ki pyar kiya

zamin rahi na raha aasman bharose ka

KHuda ki zat pe jis din se eatibar kiya

KHirad to ishq ko KHatir mein hi nahin lata

qarar dil ko diya dil hi be-qarar kiya

chale hain silsile jab se tujhe manane ke

hamein hamari ana ne hi sharmsar kiya

tera wo raaz-e-nihan aaj bhi nihan hi hai

ye baat aur ki tu ne to aashkar kiya

mile koi bhi hansi rahti hai labon pe mere

ajib lahja udasi ne iKHtiyar kiya