teri aawaz mein bhi koi aawaza nahin hota

tirī āvāz meñ bhī koī āvāza nahīñ hotā

tirī bātoñ se ab to koī andāza nahīñ hotā

kabhī baiThak tirī dopahar meñ ābād rahtī thī

khulā ab shaam ko bhī ghar kā darvāza nahīñ hotā

kabhī vo ik ishāre se samajh jaatā thā saarī baat

jatan karne se bhī ab us ko andāza nahīñ hotā

bahut hī ban-sañvar kar āj-kal ghar se nikaltā hai

magar ye kyā ki vo chehra tar-o-tāza nahīñ hotā

kabhī dukh aa ke rahte haiñ kabhī sukh aa ke rahte haiñ

kisī par band apne ghar kā darvāza nahīñ hotā

mire baare meñ vo kyā sochtā hai muuD kaisā hai

ab us se shaam ko bhī mil ke andāza nahīñ hotā

teri aawaz mein bhi koi aawaza nahin hota

teri baaton se ab to koi andaza nahin hota

kabhi baiThak teri dopahar mein aabaad rahti thi

khula ab sham ko bhi ghar ka darwaza nahin hota

kabhi wo ek ishaare se samajh jata tha sari baat

jatan karne se bhi ab us ko andaza nahin hota

bahut hi ban-sanwar kar aaj-kal ghar se nikalta hai

magar ye kya ki wo chehra tar-o-taza nahin hota

kabhi dukh aa ke rahte hain kabhi sukh aa ke rahte hain

kisi par band apne ghar ka darwaza nahin hota

mere bare mein wo kya sochta hai muD kaisa hai

ab us se sham ko bhi mil ke andaza nahin hota