teri aawaz par ruke hi nahin

tirī āvāz par ruke hī nahīñ

so ka.ī vāqiye hue hī nahīñ

us ne jitne diye maiñ le aayā

muft ke saañs the gine hī nahīñ

mo.ajize vaqt par nahīñ hote

sānehe vaqt dekhte hī nahīñ

jhūTh hai dil-ba-dar kiye ga.e haiñ

sach kaheñ ham vahāñ pe the hī nahīñ

sab haqīqat-pasand ho ga.e haiñ

log ab ḳhvāb dekhte hī nahīñ

jo tire naam meñ nahīñ aate

aise harfoñ ko jānte hī nahīñ

ris rahe haiñ jagah jagah se 'asad'

us ne kuchh zaḳhm to siye hī nahīñ

teri aawaz par ruke hi nahin

so kai waqiye hue hi nahin

us ne jitne diye main le aaya

muft ke sans the gine hi nahin

moajize waqt par nahin hote

sanehe waqt dekhte hi nahin

jhuTh hai dil-ba-dar kiye gae hain

sach kahen hum wahan pe the hi nahin

sab haqiqat-pasand ho gae hain

log ab KHwab dekhte hi nahin

jo tere nam mein nahin aate

aise harfon ko jaante hi nahin

ris rahe hain jagah jagah se 'asad'

us ne kuchh zaKHm to siye hi nahin