teri abru-o-tegh tez to ham-dam hain ye donon

tirī abrū-o-teġh tez to ham-dam haiñ ye donoñ

hue haiñ dil jigar bhī sāmne rustam haiñ ye donoñ

na kuchh kāġhaz meñ hai taane qalam ko dard nāloñ kā

likhūñ kyā ishq ke hālāt nā-mahram haiñ ye donoñ

lahū āñkhoñ se bahte vaqt rakh letā huuñ hāthoñ ko

jarāhat haiñ agar ve donoñ to marham haiñ ye donoñ

kaso chashme pe dariyā ke diyā uupar nazar rakhiye

hamāre dīda-e-nam-dīda kyā kuchh kam haiñ ye donoñ

lab jāñ-baḳhsh us ke maar hī rakhte haiñ āshiq ko

agarche āb-e-haivāñ haiñ va lekin sam haiñ ye donoñ

nahīñ abrū hī maa.il jhuk rahī hai teġh bhī idhar

hamāre kisht-o-ḳhūñ meñ muttafiq bāham haiñ ye donoñ

khule siine ke dāġhoñ par Thahar rahte haiñ kuchh aañsū

chaman meñ mahr-varzī ke gul-o-shabnam haiñ ye donoñ

kabhū dil rukne lagtā hai jigar gaahe taḌaptā hai

ġham-e-hijrāñ meñ chhātī ke hamārī jam haiñ ye donoñ

ḳhudā jaane ki duniyā meñ mileñ us se ki uqbā meñ

makāñ to 'mīr'-sāhib shohra-e-ālam haiñ ye donoñ

teri abru-o-tegh tez to ham-dam hain ye donon

hue hain dil jigar bhi samne rustam hain ye donon

na kuchh kaghaz mein hai tane qalam ko dard nalon ka

likhun kya ishq ke haalat na-mahram hain ye donon

lahu aankhon se bahte waqt rakh leta hun hathon ko

jarahat hain agar we donon to marham hain ye donon

kaso chashme pe dariya ke diya upar nazar rakhiye

hamare dida-e-nam-dida kya kuchh kam hain ye donon

lab jaan-baKHsh us ke mar hi rakhte hain aashiq ko

agarche aab-e-haiwan hain wa lekin sam hain ye donon

nahin abru hi mail jhuk rahi hai tegh bhi idhar

hamare kisht-o-KHun mein muttafiq baham hain ye donon

khule sine ke daghon par Thahar rahte hain kuchh aansu

chaman mein mahr-warzi ke gul-o-shabnam hain ye donon

kabhu dil rukne lagta hai jigar gahe taDapta hai

gham-e-hijran mein chhati ke hamari jam hain ye donon

KHuda jaane ki duniya mein milen us se ki uqba mein

makan to 'mir'-sahib shohra-e-alam hain ye donon