teri bazm-e-naz hai rang par mere dast-e-shauq mein jam hai

tirī bazm-e-nāz hai rang par mire dast-e-shauq meñ jaam hai

ye payām de mujhe sāqiyā ki hayāt raqs-e-davām hai

na.ī aarzū hai nayā samāñ na.ī justujū hai nayā jahāñ

mire saath saath ho jab se tum na.ī sub.h hai na.ī shaam hai

hai tirī talab mirī zindagī tirā zikr hai mirī bandagī

mire dil meñ terī hī yaad hai mire lab pe terā hī naam hai

hai ġhurūr-e-husn ki be-ruḳhī ise jor kahiye ki barhamī

na qadam ruke na nazar milī na salām hai na payām hai

isī tarh 'muztar'-e-ġham-navā hai ravāñ ye ziist kā qāfila

na sukūn hai na shakeb hai na qarār hai na qiyām hai

teri bazm-e-naz hai rang par mere dast-e-shauq mein jam hai

ye payam de mujhe saqiya ki hayat raqs-e-dawam hai

nai aarzu hai naya saman nai justuju hai naya jahan

mere sath sath ho jab se tum nai subh hai nai sham hai

hai teri talab meri zindagi tera zikr hai meri bandagi

mere dil mein teri hi yaad hai mere lab pe tera hi nam hai

hai ghurur-e-husn ki be-ruKHi ise jor kahiye ki barhami

na qadam ruke na nazar mili na salam hai na payam hai

isi tarh 'muztar'-e-gham-nawa hai rawan ye zist ka qafila

na sukun hai na shakeb hai na qarar hai na qiyam hai