teri chahat mere pairon ki jo zanjir ban jae

tirī chāhat mire pairoñ kī jo zanjīr ban jaa.e

to phir aise meñ jaane jaañ mirī taqdīr ban jaa.e

ḳhudā ne is qadar baḳhshī hai tujh ko husn kī daulat

tirī tasvīr jo dekhe vo ḳhud tasvīr ban jaa.e

tumhāre paañv uf ye paañv kitne ḳhūbsūrat haiñ

inheñ tum jis jagah rakh do vahīñ kashmīr ban jaa.e

jo naġhma likkhā jaa.e terī zulfoñ kī siyāhī se

kitāb-e-ishq kī sab se hasīñ tahrīr ban jaa.e

isī ummīd par bas kaT rahī hai zindagī apnī

ki ab to vasl kī shāyad koī tadbīr ban jaa.e

faqat kāñToñ se phūloñ kī hifāzat ab nahīñ mumkin

taqāzā vaqt kā hai shāḳh-e-gul shamshīr ban jaa.e

mire har ḳhvāb ko ai 'ārzū' takmīl hāsil ho

muqaddar se jo tū un kī agar ta.abīr ban jaa.e

teri chahat mere pairon ki jo zanjir ban jae

to phir aise mein jaane jaan meri taqdir ban jae

KHuda ne is qadar baKHshi hai tujh ko husn ki daulat

teri taswir jo dekhe wo KHud taswir ban jae

tumhaare panw uf ye panw kitne KHubsurat hain

inhen tum jis jagah rakh do wahin kashmir ban jae

jo naghma likkha jae teri zulfon ki siyahi se

kitab-e-ishq ki sab se hasin tahrir ban jae

isi ummid par bas kaT rahi hai zindagi apni

ki ab to wasl ki shayad koi tadbir ban jae

faqat kanTon se phulon ki hifazat ab nahin mumkin

taqaza waqt ka hai shaKH-e-gul shamshir ban jae

mere har KHwab ko ai 'arzu' takmil hasil ho

muqaddar se jo tu un ki agar tabir ban jae