teri hi tarah hamein yaad aane wala ho

tirī hī tarah hameñ yaad aane vaalā ho

tire sivā bhī koī to satāne vaalā ho

har ek sub.h yahī dil meñ huuk uThtī hai

hameñ bhī naaz se koī jagāne vaalā ho

vo kis umiid pe ghar meñ rahe ki jis ghar meñ

na aane vaalā ho koī na jaane vaalā ho

har ik se nazreñ milā.ī haiñ un ke kūche meñ

ki jaise ab koī ham ko bulāne vaalā ho

hai dostoñ ke liye aa.ina nazar merī

nazar milā.e jo nazreñ milāne vaalā ho

ki jaise koī balā mujh pe aane vaalī hai

hirās kahtā hai koī bachāne vaalā ho

chalūñ to saath chale aur rukūñ to saath na de

qadam qadam pe koī dil baḌhāne vaalā ho

kisī ko shahr meñ ab ham se laag hai na lagāo

koī to ham se bhī nazreñ bachāne vaalā ho

hamāre shahr meñ kyā kyā saje sajā.e haiñ ghar

hamāre ghar ko bhī koī sajāne vaalā ho

teri hi tarah hamein yaad aane wala ho

tere siwa bhi koi to satane wala ho

har ek subh yahi dil mein huk uThti hai

hamein bhi naz se koi jagane wala ho

wo kis umid pe ghar mein rahe ki jis ghar mein

na aane wala ho koi na jaane wala ho

har ek se nazren milai hain un ke kuche mein

ki jaise ab koi hum ko bulane wala ho

hai doston ke liye aaina nazar meri

nazar milae jo nazren milane wala ho

ki jaise koi bala mujh pe aane wali hai

hiras kahta hai koi bachane wala ho

chalun to sath chale aur rukun to sath na de

qadam qadam pe koi dil baDhane wala ho

kisi ko shahr mein ab hum se lag hai na lagao

koi to hum se bhi nazren bachane wala ho

hamare shahr mein kya kya saje sajae hain ghar

hamare ghar ko bhi koi sajaane wala ho