تری جفا بخدا باعث گزند نہیں

تری جفا بخدا باعث گزند نہیں

مذاق عشق ترا کچھ مگر بلند نہیں

نیاز حسن کے قابل تو میں نہیں لیکن

یہ کس طرح سے کہوں میں نیاز مند نہیں

اسے خبر نہیں کیا شے ہے عشرت ابدی

جو تیرے درد محبت سے بہرہ مند نہیں

بڑا ہو کوئی تو خاطر میں ہم نہیں لاتے

جو پست ہو کے محبت میں سر بلند نہیں

نظر کے سامنے پھرتی ہے کس لئے ہر دم

وہ اک ادا جو اسے خود بھی کچھ پسند نہیں

نہیں کہ شرم و حیا وصف خاص ہے اس کا

کہ یہ حجابی و شوخی میں وہ بھی بند نہیں

ہزار کام ہیں ایسے جنہیں میں کرتا ہوں

اگرچہ دل سے مجھے ایک بھی پسند نہیں

ستانے والوں سے اپنے یہ پوچھتا ہوں جلیلؔ

تمہارے سینوں میں کیا قلب درد مند نہیں